O grupo político Podemos Ourense vén de solicitar oficialmente ao concello a elaboración dun informe que avalíe a situación da vivenda na cidade, co obxectivo de que a Xunta de Galicia poida declarar Ourense como zona de mercado residencial tensionado, conforme á Lei 12/2023, do 24 de maio, polo dereito á vivenda.
A petición fundaméntase na crecente dificultade para acceder a unha vivenda en Ourense, onde os prezos do alugueiro aumentaron un 8,7% nos últimos tres anos, superando o crecemento do IPC autonómico. Ademais, a porcentaxe de ingresos destinada ao alugueiro na cidade alcanza o 55,4%, unha cifra superior á media estatal do 52,9%, a pesar de que os ingresos en Ourense (1.221 euros mensuais) son considerablemente inferiores á media española (1.987 euros).
Se o informe confirma que Ourense cumpre os requisitos establecidos na lei, a súa declaración como zona tensionada permitiría aplicar medidas que limitarían a escalada dos prezos do alugueiro. Entre estas medidas inclúense a aplicación dun índice de referencia para os prezos, bonificacións fiscais para propietarios que rebaixen as rendas e incentivos para contratos de longa duración.
Podemos Ourense destaca a necesidade de actuar con urxencia para garantir que o dereito á vivenda non se converta nun privilexio e solicita ao concello que inicie os trámites necesarios para que a Xunta de Galicia poida tomar as medidas pertinentes en defensa dos dereitos da cidadanía.
