A alcaldesa de Mos, Nidia Arévalo, acompañada pola concelleira de Deportes, Felisa Rodríguez, e membros do equipo de goberno, visitou esta mañá o Pavillón Municipal Óscar Pereiro para comprobar o resultado final das obras de mellora e modernización recentemente rematadas.
As actuacións, cun investimento total de 169.878,87 euros, realizáronse no marco do II Plan Extraordinario de Infraestruturas Deportivas da Deputación de Pontevedra e tiveron como obxectivo a posta a punto e actualización integral das instalacións para ofrecer espazos máis confortables, seguros e eficientes para a práctica deportiva.
Os traballos incluíron a reforma e vernizado da pista principal, a renovación de bancadas e zonas de acceso, melloras no sistema de iluminación e actuacións de mantemento en vestiarios e zonas comúns.
Na piscina cuberta realizouse a renovación da cuberta do inmoble, substituíndo paneis e ancoraxes deteriorados para evitar filtracións de auga, ademais de traballos de selado e acondicionamento.
Durante a visita, a alcaldesa destacou que “estas obras forman parte do compromiso continuo do Concello de Mos coa mellora das infraestruturas deportivas municipais, para ofrecer espazos de calidade a todos os clubs, escolas e usuarios”.
O Pavillón Óscar Pereiro é unha das instalacións máis emblemáticas do municipio, acollendo competicións, eventos e adestramentos de disciplinas como fútbol sala, baloncesto, patinaxe ou ximnasia rítmica.
Con esta intervención, o Concello de Mos continúa a súa aposta pola promoción do deporte e a vida saudable, consolidando unha rede de infraestruturas modernas, accesibles e adaptadas ás necesidades actuais da veciñanza.
