- Segundo a lexislación vixente, é a Administración municipal quen ten que avaliar as necesidades da asistencia sanitaria e o persoal médico que precisa para celebrar eventos en base á tipoloxía, os aforos e os lugares de celebracións
- É competencia municipal do consistorio cambadés -e non da Administración Sanitaria Pública galega- a contratación destes servizos a empresas que se encarguen de realizar a cobertura médico-sanitaria para todo tipo de eventos e actos
- O Servizo Galego de Saúde, a través da súa Área Sanitaria de Pontevedra-O Salnés lembra ao Concello de Cambados a súa responsabilidade para coa organización de eventos festivos, tendo en conta todo o relacionado coa saúde dos empregados, o público e os participantes destes eventos, en base á normativa actual.
Para iso, a Administración municipal será quen teña que avaliar as necesidades da asistencia sanitaria e o persoal médico que precisa para celebrar eventos. Ditas necesidades serán en base á tipoloxía, os aforos e os lugares de celebracións dos actos, segundo a lexislación vixente.
É competencia municipal do consistorio cambadés -e non da Administración Sanitaria Pública galega- a contratación deses servizos a empresas que se encarguen de realizar a cobertura médico-sanitaria. Dita cobertura ten que ser para todo tipo de eventos e actos.
Dispositivos sanitarios axeitados
Tamén son necesarios dispositivos sanitarios axeitados ás necesidades de cada servizo extraordinario. Para iso, lémbrase que deberá ser o Concello cambadés quen proporcione os materiais e os recursos humanos para realizar unha asistencia médica profesional e de calidade ao público e participantes dos seus eventos.
Eses servizos responderán á necesidade legal e de obrigado cumprimento, de dispoñer dunha cobertura sanitaria en certos tipos de actos festivos no Concello de Cambados -concertos, festas populares, etc-.