Os actos terán lugar o vindeiro domingo 25 de agosto ás 19 horas no Centro Cultural Teleclub de Romai
A Asociación Cultural Xosefina Figueroa Barros, de Romai, celebra o seu 50º aniversario, o vindeiro domingo 25 agosto a partir das 19 horas, no Centro Cultural Teleclub de Romai cunha serie de actos entre os que destaca un relatorio histórico dos feitos máis senlleiros desta entidade desde a súa fundación e unha homenaxe a Elixio Mandayo Carballo, “Lucho Mandayo”, ex presidente e cofundador desta institución.
Este acto conmemorativo estará aberto á participación de todas aquelas persoas que desexen unirse a esta celebración tan especial para esta asociación que cumpre as súas vodas de ouro de servizo á cultura e á comunidade.
O evento comezará cun relato da historia da asociación, destacando os fitos máis importantes que marcaron o seu desenvolvemento desde a súa fundación en 1974. A continuación, renderase unha homenaxe a Elixio Mandayo Carballo, en recoñecemento ao seu labor e dedicación, xa que foi ex presidente da entidade e co fundador da mesma ademais de ser o primeiro alcalde de Portas na democracia.
A Asociación Cultural Xosefina Figueroa Barros toma do seu nome desta mestra que naceu no ano 1903 en Viascón (Cerdedo-Cotobade) e tras exercer no concello das Neves foi trasladada a Romai no ano 1944 desenvolvendo unha traxectoria profesional e persoal que deixou unha impronta de xenerosidade e altruismo en diversas xeracións de alumnos que pasaron pola súa escola.
Precisamente esta escola reconvertida en local sociocultural foi obxecto dunha restauración integral levada a cabo e sufragada economicamente polas netas de Xosefina Figueroa Barros en outubro do ano 2022 como xeito de honrar a figura e a memoria da súa avoa.
A xornada seguirá cunha actuación do Grupo Folclórico Os Gatiños de Portonovo, que achegará un toque tradicional e festivo co seu repertorio de música e danzas galegas.
Como peche, todos os asistentes poderán gozar dunha degustación de petiscos, nun ambiente distendido e familiar que reflicte o espírito acolledor desta comunidade.
Data: 25 de agosto de 2024
Hora: 19:00 h
Lugar: Centro Cultural Teleclub de Romai
