• A programación dos meses de xullo e agosto mantén a súa aposta polo uso de novas tecnoloxías, con obradoiros e cursos gratuítos adaptados ás necesidades de nenos, nenas e veciños e veciñas da terceira idade
• Unha das propostas novidosas será ‘Finanzas para todos’, que se realiza en colaboración co Banco de España
A actividade non decaerá na Aula Cemit de Cuntis, senón máis ben todo o contrario. Durante os meses de xullo e agosto, as dependencias, situadas no número 65 da Circunvalación Don Aurelio, ofreceranse un gran número de iniciativas, que sumarán en total máis de 100 horas formativas de carácter gratuíto. Nesta época do ano ponse o foco especialmente na rapazada, así como nas persoas maiores.
Ademais de manter sesións e cursos que xa son habituais ao longo de todo o ano, esta programación de verán tamén introduce novidades. Unha das principais comezará, precisamente, o vindeiro luns, 1 de xullo. Trátase das sesións ‘Finanzas para todos’, que se desenvolven en colaboración co Banco de España, co obxectivo de dotar á cidadanía dos coñecementos básicos e das ferramentas necesarias para manexar as súas finanzas de forma responsable e útil, neutral e libre de calquera interese comercial. Este ciclo pon o foco especialmente nas persoas maiores, que en moitas ocasións son as que máis dificultades teñen á hora de manexar a banca electrónica ou que máis protección
necesitan contra ciberestafas. Este curso prolongarase tamén os luns 8 e 15 de xullo, de 10.00 a 12.30 horas. Tamén está pensado para a terceira idade o ciclo de iniciación á informática, os martes e xoves de xullo, para achegar consellos prácticos sobre utilización do ordenador, Internet ou programas básicos. Ademais, os luns, mércores e venres, entre as 10.30 horas e as 12.30, haberá sesións sobre o uso de ‘smarthpones’. Estas clases tamén serán en agosto, ás que hai que sumar o servizo de atención tecnolóxica, luns mércores e venres en xullo e de luns a xoves en agosto.
Con respecto á rapazada, xa desde o día 1 de xullo, os luns e mércores ofreceranse clases de impresión 3D, de 13.30 a 14.30 horas, a nenos e nenas de idades comprendidas entre os 8 e os 14 anos. En agosto, será de luns a xoves e o alumnado dividirase en dous grupos. Outra actividade para cativos e cativas nos dous meses de verán será o curso de mecanografía, que en agosto tamén contará con dous grupos diferentes. Por outra banda, os días 22 e 24 de xullo, volverá ‘Girl Steam’, un obradoiro que xa se celebrou con éxito en anos anteriores e que está dirixido a mozos e mozas de entre 8 e 15 anos, divididos en dous grupos distintos. Esta iniciativa busca fomentar o uso creativo, práctico e crítico da tecnoloxía, fomentando o talento e os valores. O día 22 dirixirase ao grupo de 8 a 11 anos e o 24, para os de 12 a 15. Requírese de inscrición previa. A programación de verán completaras cos diferentes exames presenciais de teleformación de Espazo Multimedia de Aprendizaxe (EMA).
Para consultar a oferta de cursos, solicitar o uso das dependencias ou tramitar calquera outra dúbida, a veciñanza pódese poñer en contacto co responsable deste servizo chamando ao 683147165 ou ben enviar un correo electrónico á dirección cemit.cuntis@xunta.gal.