• A actividade, que dará comezo ás 17.30 horas, mistura o galego con lingua de sinais, ademais de elementos de apoio visual para facilitar a súa comprensión, segundo apunta a concelleira de Cultura e Educación, Raquel Rodríguez (BNG)
• Esta iniciativa forma parte do programa Ler conta Moito e está pensada para crianzas maiores de 5 anos
‘Rosa caramelo’ é o contacontos que este venres será o protagonista dunha nova cita do programa Ler conta Moito. Esta actividade gratuíta, que terá lugar a partir das 17.30 horas na Biblioteca Municipal de Campelo, é unha clara aposta pola linguaxe e a comunicación universal e inclusiva, ao mesturar o galego coa lingua de sinais, ademais de facer uso de elementos visuais que “sen dúbida facilitan comprensión de todas e todos os asistentes”, tal e como explica a concelleira de Cultura e Educación, a nacionalista Raquel Rodríguez.
A cita está pensada para crianzas maiores de 5 anos e destaca, ademais de pola súa accesibilidade na linguaxe, por apostar pola teatralización. Este contacontos da continuidade ao ofrecido a pasada semana, tamén nas dependencias da biblioteca, polo Correo do Vento, que contou cunha gran asistencia. O programa Ler conta Moito terá continuidade en outubro, co contacontos ‘Sopicontos’. Será o martes 24, tamén ás 17.30 horas.
Desde a Concellería de Cultura e Educación lémbrase que, á marxe da organización deste tipo de actividades, a Biblioteca Municipal está operativa xa co horario de inverno, de luns a venres de 16.30 a 19.30 horas.