• As instalacións estarán abertas ao público de luns a venres, de 11.00 a 14.30 horas
• Ademais de incorporar varias novidades ao seu catálogo, tamén organizará diferentes actividades ao longo da tempada estival
A Biblioteca Municipal, situada en Campelo, modificará o seu horario a partir da vindeira semana, tal e como informa a concelleira de Cultura, a nacionalista Raquel Rodríguez. Desde este día, e ata a finalización do verán, as dependencias pasarán a estar operativas para a veciñanza polas mañás, de luns a venres, concretamente entre as 11.00 e as 14.30 horas.
Ademais, a titular de Cultura adianta que, como xa vén sendo habitual, ao longo da tempada estival a biblioteca impulsará diferentes iniciativas. Así, en agosto, o día 19, desenvolverase unha nova edición do obradoiro de caligrafía creativa. Trátase dunha actividade que está dirixida á rapazada maior de 8 anos. É un curso de carácter gratuíto e dunha hora de duración, a través do cal os nenos e nenas practican a caligrafía a man, unha práctica que “coa auxe das novas tecnoloxías, que fai que cada vez esteamos máis afeitas e afeitos a usar pantallas, parece que estamos a perder, especialmente entre as novas xeracións”, apunta Rodríguez Alonso.
Por outra banda, este verán tamén se habilitará na biblioteca un centro de interese co Atlas dos lugares literarios, no que se inclúen propostas de lectura, incluíndo clásicos universais. A maiores, a Concellería de Cultura segue a apostar pola renovación constante do catálogo existente nestas dependencias, para continuar consolidando “un servizo a través do cal apostamos pola difusión e promoción da literatura e da nosa cultura e da lingua galega”.