- A cita será o xoves 23 de xaneiro, ás 18:30, cunha charla dirixida á rapazada de 8 a 12 anos de idade. A científica e divulgadora redondelá Paula Rivas é a autora do libro “A incrible viaxe de Antía ao cerebro humano”, editado por Xerais.
- Nesta actividade a experta en neurociencia explorará cos participantes moitas curiosidades sobre o cerebro humano. A actividade é de balde, con prazas limitadas, e a inscrición debe facerse na propia Biblioteca Xela Arias.
Dentro do ciclo «Aquí si hai quen escriba», co que as bibliotecas divulgan a creación literaria da veciñanza de Redondela, a vindeira semana estará na Biblioteca Xela Arias de Chapela a bióloga redondelá Paula Rivas, autora do libro “A incrible viaxe de Antía ao cerebro humano”, editado por Xerais. A autora, cun doutorado en neurociencia, está a facer unha gran labor divulgativa sobre o funcionamento do sistema nervioso con esta obra dirixida á rapazada.
A cita será o xoves 23 de xaneiro, ás 18:30, cunha estimulante charla dirixida á rapazada de 8 a 12 anos de idade, para que coñezan como traballa o “ordenador” que fai funcionar aos seres humanos. A científica explorará cos participantes moitas curiosidades sobre neuronas, nervios, sentidos e hemisferios cerebrais.
A medio camiño entre a ficción e a divulgación, “A incrible viaxe de Antía ao cerebro humano” é un libro para aprender gozando da lectura. Durante unha excursión a un instituto de investigación en neurociencia, a protagonista desta historia pérdese dos seus compañeiros e coñece uns ratos científicos que lle explican como funcionan o cerebro e o sistema nervioso, e tamén que son as neuronas e como percibimos as cousas a través dos sentidos. Pouco a pouco, Antía vai descubrindo que detrás dos ratos hai nomes de científicos famosos (Santiago Ramón y Cajal, Alois Alzheimer, James Parkinson e Margarita Salas) e vive unha experiencia extraordinaria.
Paula Rivas Ramírez (Redondela, 1984) estudou Bioloxía na Universidade de Vigo, onde posteriormente realizou o mestrado e o doutoramento en Neurociencias. Traballou como científica no Instituto de Química Orgánica e Bioquímica (IOCB) e no Instituto de Medicina Experimental (IEM) en Praga e na Universidade da Sorbona en París. Actualmente, ademais de seguir investigando e impartindo docencia no campo da neurociencia, realiza actividades de divulgación científica.
A actividade do xoves día 23 en Chapela é de balde, con prazas limitadas, e a inscrición debe facerse na propia Biblioteca Xela Arias.
