• Entre os e as participantes das últimas expedicións inclúense estudantes do SEK-Atlántico, que tomaron parte nestas visitas, que contan coa colaboración da Asociación Galicia Histórica
A Casa Museo de Colón vén de recibir a preto de 100 visitantes nas últimas semanas, a maioría dos cales chegaron a través de visitas guiadas que se levaron a cabo en colaboración coa Asociación Galicia Histórica. Un destes grupos foi o que estivo formado por uns 20 alumnos e alumnas do Colegio SEK-Atlántico, que tiveron ocasión de coñecer as dependencias de Portosanto o pasado 24 de maio. Uns días máis tarde o museo acolleu a chegada de máis de 60 integrantes dunha excursión organizada polo Espazo +60 Afundación de Pontedeume. Nestas visitas guiadas o encargado de exercer de anfitrión foi o presidente de Galicia Histórica, Pedro Martín, que explicou a todos e todas as asistentes os detalles da teoría da orixe galega de Cristóbal Colón, sobre a cal se pode atopar extensa documentación e material audiovisual na Casa Museo.
As visitas guiadas organizadas pódense solicitar poñéndose en contacto previamente co Concello de Poio e a Concellería de Turismo. Está previsto que a vindeira semana, concretamente o xoves 15, chegue unha nova expedición, composta por máis de 50 integrantes da Asociación de Maiores de Telefónica da Coruña. Estes visitantes, ademais de coñecer o museo poiense, terán ocasión de visitar outros lugares de interese do municipio, como son a Illa de Tambo, o Casco Histórico de Combarro ou a ruta dos muíños da Freixa, na parroquia de San Xoán.
A maiores, o Concello de Poio lembra que tamén se pode visitar a Casa Museo de Colón de 15.30 a 20.30 horas de martes a venres ou ben os sábados en horario de mañá (de 9.30 a 14.30 horas). Pódese obter máis información sobre as dependencias e os seus atractivos na páxina web www.turismopoio.com
