O período de recepción de propostas comezou onte, 5 de decembro, e permanecerá activo até o vindeiro
O tecido asociativo e as institucións poderán propor a aquelas persoas ou entidades que destacasen polo seu labor e pola proxección da cidade durante o último ano.
A Concellaría de Cultura vén de abrir o prazo de presentación de candidaturas aos Premios Cidade de Pontevedra, uns galardóns destinados a recoñecer o labor relevante desenvolvido por persoas e colectivos a prol do municipio e da súa cidadanía. Conforme ao estipulado nas bases, o prazo de presentación de propostas iniciouse onte, 5 de decembro, e rematará o 5 de xaneiro.
Os Premios Cidade de Pontevedra estrutúranse en dúas modalidades: a categoría de persoa física e a categoría de persoa xurídica. A finalidade destes recoñecementos é galardoar o traballo desenvolvido por persoas a título individual, así como por asociacións, entidades ou colectivos de carácter cultural, social, xuvenil ou empresarial, entre outros, que contribuísen de xeito especial á proxección de Pontevedra ou dos seus habitantes.
Calquera asociación, institución, entidade ou colectivo poderá presentar candidaturas a través do Rexistro do Concello. É importante lembrar que as bases non permiten que ningunha entidade ou persoa se propoña a si mesma para o premio.
Para formalizar a proposta, será imprescindíbel achegar unha memoria xustificativa na que se detallen os méritos da candidatura e se salienten os aspectos máis relevantes da traxectoria persoal ou profesional, facendo fincapé no labor desenvolvido durante o ano en curso. O xurado valorará especialmente o traballo realizado ao longo do último ano, así como a súa repercusión na sociedade pontevedresa.
Entrega dos galardóns
As distincións entregaranse nunha sesión extraordinaria de honra do Pleno da Corporación, que se celebrará o 20 de xaneiro, coincidindo coa festividade de San Sebastián, patrón da cidade.
A Concellaría de Cultura anima a todo o tecido social e asociativo da cidade a participar activamente neste proceso para poñer en valor o talento, o esforzo e a dedicación da veciñanza e das organizacións que constrúen Pontevedra día a día.
