A alta como praia fluvial incluída no Rexistro de Augas de Baño de Galicia permite a inspección periódica da calidade da súas augas
O pasado mes de febreiro a Consellería de Sanidade da Xunta de Galicia resolveu dar de alta no Rexistro de Augas de Baño de Galicia (en diante RABG) da zona de baño Río Tea-Foxaco, do concello de Mondariz. A publicación oficial desta resolución, realizada a instancias de Xoán C. Montes Bugarín no ano 2020, tivo lugar no DOG do 23.05.2025 mediante resolución da Directora Xeral de Saúde Pública.
Esta nova leva aparellada a inclusión na sección II do Rexistro de Augas de Baño de Galicia (correspondente ás augas de baño en avaliación) para a tempada de baño de 2025, e o inicio dos controis analíticos segundo o calendario.
As obrigas que, a partir de agora, contrae o Concello con esta praia fluvial oficial son:
a) Manter as debidas condicións de limpeza, hixiene e salubridade.
b) Instalar carteis coa información sobre as características da praia e as medidas de seguridade.
c) Vixiar os posibles puntos de ver-do pretos á praia para que non exista contaminación das augas de baño en ningún momento nin supoñan riscos para as persoas usuarias.
d) Controlar, durante a temporada de baño, mediante inspección visual periódica a transparencia da auga, a presenza de restos orgánicos, plásticos e calquera outro residuo u organismo.
e) Informar aos usuarios da zona de baño sobre a xestión da calidade das augas de baño.
Melloras urxentes
A tal fin, o noso grupo solicitará no próximo pleno ordinario da Corporación a instalación dun panel informativo, no que poder fixar as analíticas periódicas da auga de baño que realiza a Consellería de Sanidade. Así mesmo solicitaremos a reparación urxente de tres dos cinco bancos de madeira que se localizan na praia, a fin de poidan ser utilizados polas persoas usuarias durante este verán.
Alternativa por Mondariz quere felicitar a todas as veciñas a veciños de Mondariz por disponer dunha nova zona de baño oficial que xa ofrece todas as garantías sanitarias. Por último, o noso portavoz, Xoán C. Montes —Calis—, pide a todos os/as bañistas que coiden e respecten esta praia fluvial con calidade da auga controlada, evitando tamén o depósito de calquera tipo de lixo que a deteriore ou estrague.
