• CONTARÁ CON MÁIS DUNHA DUCIA DE INSCRITOS DE DISTINTOS PUNTOS DA COMUNIDADE, OS CALES COMPETIRÁN NO RING DO RECINTO FEIRA INTERNACIONAL DE GALICIA ABANCA
• INCLUIRÁ CINCO MODALIDADES DESTA DISCIPLINA HÍPICA
O evento ecuestre Equina Galicia 2021, o cal se celebrará do 30 de xullo ao 1 de agosto no recinto Feira Internacional de Galicia ABANCA, é o lugar escollido pola Federación Galega de Enganches para poñer en marcha a súa competición anual.
Así, o último día de Equina terá lugar a primeira xornada de liga da Copa Galega de Enganches, a cal levará a cabo un total de seis xornadas nesta tempada.
Contará con máis dunha ducia de inscritos de distintos puntos de Galicia e serán cinco as modalidades desta competición: Mini Poni, orientada a nenos que participan cunha carruaxe tirada por un poni; Sulky, con coches de dúas rodas e un cabalo; Limonera e Troncos, ambas consistentes en carruaxes de catro rodas pero cun cabalo no primeiro caso e con dous no segundo, e tamén Cuartos, os cales son moi vistosos, xa que inclúen catro cabalos.
Catro competicións máis
Equina Galicia 2021, organizada pola Asociación de Criadores de Cabalos Españois de Galicia (Accega), contará tamén coa celebración do VII Campionato de España Pura Raza Española-ANCCE de Galicia, o cal se desenvolverá durante os tres días de Equina Galicia e é o eixo central do evento. Trátase dunha proba morfofuncional na que se valorará tanto a morfoloxía dos exemplares como os seus movementos.
Ademais, este evento incluirá tres concursos centrados na doma clásica, os cales serán a XXIII Copa Accega de Doma Clásica, o Territorial e o III Trofeo Xunta de Galicia-Medio Rural de Doma Clásica. Este último conta co apoio da Consellería do Medio Rural.
