Os deputados provinciais Javier Tourís e Marcos Guisasola visitaron hoxe coa alcaldesa Marta Giráldez as instalacións do campo, que serán reformadas cos recursos do II Plan Extraordinario de Infraestruturas Deportivas
O Concello de Meis recibirá este ano ao abeiro do plan un 136% máis recursos que na edición anterior, cando obtivo 44.000 euros
Os deputados provinciais Javier Tourís e Marcos Guisasola, xunto coa alcaldesa de Meis, Marta Giráldez, visitaron o campo de fútbol José Betanzos Doval, “Pepe”, na parroquia do Mosteiro, onde anunciaron que a Deputación aprobará na Xunta de Goberno deste venres unha inxección económica de 104.000 euros para a transformación destas instalacións deportivas. Farao ao abeiro do II Plan Extraordinario de Infraestruturas Deportivas, dotado con oito millóns de euros, o dobre que na súa primeira edición; un programa co que a institución provincial está a transformar e modernizar os equipamentos deportivos da provincia. De feito, o Concello recibirá este ano un 136% máis de recursos ao abeiro deste plan que na anterior edición, cando recibiu 44.000 euros.
Con estes máis de 100.000 euros, o Concello de Meis financiará o 100% das obras de modernización do campo de fútbol José Betanzos Doval, que consistirán na mellora dos acabados interiores e do equipamento dos vestiarios existentes, ademais da renovación dos asentos das gradas, do repintado das mesmas e da ampliación das escaleiras de acceso ás gradas, co fin de mellorar a accesibilidade e evacuación do público. “Este campo precisaba desta actuación para converterse nun espazo deportivo do século XXI para a veciñanza de Meis e, como sempre desde o goberno provincial, respectando a vontade dos concellos, estando ao seu carón apoiándoos cando o precisan”, remarcou Tourís.
O deputado provincial lembrou que o deporte é un dos eixos prioritarios do goberno da Deputación, “con recursos nunca antes vistos nesta institución”. Neste eido, Javier Tourís sinalou os 8 millóns do Plan Extraordinario de Infraestruturas Deportivas que está a permitir modernizar os equipamentos públicos dos concellos da provincia. “Sabemos –indicou o deputado– que iniciativas como este plan son unha importante inxección para o deporte, porque están a permitir transformar os equipamentos deportivos municipais como nunca antes se fixera, pero son tamén unha inxección municipalista, económica e de emprego, que está a conseguir que esta provincia avance e sexa, se cabe, moito máis extraordinaria do que xa é”.
