Luis López sitúa ao Polígono Industrial de Barro como “unha infraestrutura fundamental para a economía da provincia de Pontevedra” e remarca que nestes momentos son 27 as empresas instaladas, con 13 parcelas dispoñibles das que 3 están xa reservadas
A Xunta de Goberno aproba o exercicio de opción de compra da empresa Transfrío Rías Baixas SL sobre a parcela A-15, por valor de preto de 220.000 euros
A Deputación de Pontevedra acaba de aprobar o exercicio de opción de compra da empresa Transfrío Rías Baixas SL sobre a parcela A-15 do Polígono de Barro, por valor de preto de 220.000 euros. Neste eido, tal e como informou o presidente provincial Luis López, esta “infraestrutura fundamental para a economía da provincia de Pontevedra” ten xa ocupadas o 83% das parcelas, con 28 empresas instaladas e 13 parcelas dispoñibles das que 3 están reservadas.
“Este é un parque empresarial de éxito, un referente” destacou López quen engadiu que “a súa situación estratéxica é todo un acerto” a pouco máis de 10 minutos de Pontevedra, 15 de Sanxenxo, 40 de Vigo ou 45 de Santiago e “está a convertelo nun dos grandes polos económicos de Galicia”. Neste eido, o presidente provincial remarcou a vontade de seguir traballando “para que as empresas se asenten na provincia de Pontevedra, dinamicen a economía e xeren oportunidades de emprego entre a nosa veciñanza”.
Nestes momentos, en Barro atópanse situadas 27 empresas: Hijos de Rivera, Froiz, Autocares Novas Rías, Mariscos Alumar, Estación de Servicio Low Cost, TC Group Atlántico, M&G Técnicos Servicios Globales Logísticos; Aricur, Balvalen, José Benito González Villaverde, Rafael Díaz Buceta, Frutas Moncho, Transfrío Rías Baixas, Acuña, Mafari Café, Docer, Tecfrisa, Gescogra, Gasóleos Rías Baixas, Carpas Pontevedra, EDF Solar, CAENOR, Bespi Inversiones, Gestión de recursos y maquinaria, Prosol Energía, Artesa Rías Baixas y Distribuciones Maroño e Hijos. Tamén se sitúan no Polígono instalacións da Deputación de Pontevedra como o Viveiro de Empresas, o Centro de Apoio Empresarial ou o Parque de Maquinaria.
