Estes novos recursos permitirán contratar de maneira temporal a un total de 22 persoas para cubrir diferentes necesidades de ámbalas dúas administracións locais
A Xunta de Goberno da Deputación de Pontevedra aprobou novos recursos para a activación do emprego na provincia, concretamente nos concellos de Rodeiro e Vilanova de Arousa, aos que destinará preto de 280.000 euros para a contratación dun total de 22 persoas. “O emprego é un dos nosos obxectivos prioritarios, e queremos que a cidadanía da provincia, viva onde viva, teña oportunidades”, asegurou o presidente da Deputación, Luis López.
Desta maneira, o Concello de Rodeiro recibe algo máis de 120.000 euros para poder proceder á contratación temporal dun total de 12 persoas para desempeñar diferentes postos, como educadores sociais, peóns de obras públicas, traballadores sociais, técnicos de educación infantil, etc., que terán contratos cunha duración de entre 6 e 11 meses.
Por outra banda, no caso do Concello de Vilanova de Arousa, o orzamento destinado é próximo aos 160.000 euros, o que permitirá á corporación municipal formalizar a contratación de 10 persoas entre chofer-tractorista, albaneis, limpadores, mantedores de edificios, fontaneiros e guías de turismo. Mentres que algúns dos contratos serán de seis meses o resto terán unha duración de 10 meses.
