“Trátase dun paso máis para converter o territorio da provincia nun destino intelixente, e para ofrecer ás persoas visitantes novas propostas para realizar aquí, en Pontevedra”, subliñou o presidente Luis López
O proxecto Smartguide, como así se chama esta iniciativa, desenvolverase en colaboración coa Asociación de Desenvolvemento Rural Terras de Pontevedra norte
A Deputación de Pontevedra aprobou hoxe un convenio de colaboración coa Asociación de Desenvolvemento Rural Terras de Pontevedra norte para poñer en marcha o proxecto Smartguide, que conta cun orzamento de máis de 300.000 euros e que se desenvolverá ao abeiro do Plan de Sostibilidade Turística en Destino Deza Tabeirós-Terra de Montes. Os camiños por dentro, financiado con fondos NextGeneration.
“Este novo proxecto é un paso máis para converter o territorio da provincia nun destino intelixente, e para ofrecer ás persoas visitantes novas propostas para realizar aquí, na provincia de Pontevedra”, asegurou Luis López. Neste eido, o presidente explicou que o principal obxectivo desta iniciativa é poñer en valor e dotar de recursos aos camiños de Santiago que pasan polas comarcas, o da Geira e dos Arrieiros e o Miñoto Ribeiro.
O proxecto contempla a implantación dunha plataforma turística “Smartguide” e comunicación dixital dos camiños da Geira e dos Arrieiros e o Miñoto Ribeiro, a xeración de contido audiovisual asociado aos Camiños de Santiago e aos recursos cabeceira das comarcas, e a recompilación e integración na plataforma da información existente.
