A obra “O Galo Quirico e os seus amigos” representarase a cargo da compañía Seisdedos Marionetas Tradicionais no CEIP A Lama ás 11:00 horas
O espectáculo “Libros, libros, libros: Todo está nos libros” chegará da man da Maga Fani ao CEIP Antonio Cerviño de Campo Lameiro ás 12:00 horas
+Escénicas é o circuíto da institución provincial que leva unha completa programación de teatro e danza aos concellos de menos de 20.000 habitantes
A Deputación de Pontevedra leva este venres 24 de outubro o circuíto +Escénicas ao concello da Lama cunha obra de marionetas a cargo da compañía Seisdedos Marionetas Tradicionais e ao concello de Campo Lameiro cun espectáculo de ilusionismo a cargo da Maga Fani. Trátanse de dúas actuacións enmarcadas na segunda edición desta iniciativa provincial, que apoia a programación de teatro e danza nos concellos de menos de 20.000 habitantes da provincia cun orzamento de 195.000 euros, 45.000 euros máis que na súa primeira convocatoria.
“O Galo Quirico e os seus amigos” representarase no CEIP A Lama a partir das 11:00 horas e trátase dunha novo proposta do conto popular na que os espectadores da Lama participarán cantando e bailando xunto a números de marionetas tradicionais. A compañía recupera para a ocasión esta posta en escena, con monicreques, teatriño de cartón e música en directo interpretada polo acordeonista Carlos Quintá. Pola súa banda, “Libros, libros, libros: Todo está nos libros” chegará ao CEIP Antonio Cerviño de Campo Lameiro ás 12:00 horas para amosar como os libros fan abrir a mente ao coñecemento e ao respecto. Por iso ler neles, tocalos e aloumiñalos é máxico.
Co circuíto +Escénicas, a Deputación dá resposta a unha demanda que o sector profesional vén facendo desde fai máis de 15 anos. Tralo éxito da primeira edición, entre abril de 2025 e marzo de 2026 representaranse un total de 136 funcións, escollidas entre un catálogo de espectáculos dispoñible no sitio web da Deputación de Pontevedra, en 50 concellos da provincia de Pontevedra.
