Os deputados provinciais Javier Tourís e Marcos Guisasola visitaron co alcalde, Samuel Lago, este espazo que recibiu 600.000 euros dentro do Plan Extra Provincia Extraordinaria e outros 200.000 euros para sufragar a achega municipal a través do Plan +Provincia
Os deputados provinciais Javier Tourís e Marcos Guisasola visitaron xunto co alcalde de Cambados, Samuel Lago, o Pazo Torrado. A Deputación de Pontevedra vai investir preto de 800.000 euros para facer fronte á totalidade do proxecto de reforma e posta en valor deste espazo e dos seus xardíns, cunha achega de preto de 600.000 euros a través do Plan Extra Provincia Extraordinaria e outra axuda de 200.000 euros coa que se fará cargo da achega municipal ao proxecto a través da liña 1 de investimentos do Plan +Provincia.
As obras financiadas pola Deputación inclúen, no ámbito do Pazo, a renovación total de carpintaría exterior e das tarimas, a mellora da envolvente térmica (que suporá minimizar o consumo de enerxía, así como mellorar as condicións de habitabilidade e salubridade interiores), a renovación e illamento da cuberta, a revisión estrutural dos elementos de sustento, a dotación de instalacións que permitan o seu funcionamento como espazos museístico e unha renovación completa da iluminación. En canto ás actuacións nos xardíns, mellorarase o sistema de iluminación, executaranse tarefas de conservación dos elementos singulares como o hórreo, o pombal, os alpendres e outros espazos anexos, e a revitalización das especies vexetais. Ademais, renovaranse os aseos e substituirase parcialmente o muro de perímetro de peche nos lugares onde se atope máis deteriorado.
O deputado provincial lembrou que se trata dun proxecto que atende á necesidade de potenciar a promoción da cultura -especialmente cando esta está ligada e integrada en ámbitos de importancia histórica-, da actividade física e a saúde, así como á reordenación do espazo público a favor de espazos de xogo en convivencia con espazos naturais. Tamén remarcou que o goberno provincial “escoita as demandas dos gobernos locais e atende as súas necesidades”, e recordou que “acabamos de aumentar o crédito do Plan Extra ata os 38 millóns de euros para que todos os concellos poidan acceder aos fondos”. Neste eido, salientou que “este plan trátase dunha oportunidade histórica para os concellos e por iso non podiamos deixar ningún atrás, queriamos que todos os 59 concellos de menos de 50.000 habitantes se puidesen beneficiar para poder executar proxectos estratéxicos cos que mellorar as súas infraestruturas ou dotacións municipais”.
