O Concello de Mos, a través da Escola de Música e Conservatorio Profesional de Música de Torroso, achegou estes días aos centros educativos do municipio un espectáculo audiovisual de Nadal dirixido ao alumnado de Educación Infantil e Primaria, co obxectivo de combinar música, narración e valores educativos.
A alcaldesa de Mos, Nidia Arévalo, asistiu á función celebrada no CEIP Mestre Martínez Alonso, onde puido compartir coa comunidade educativa esta proposta cultural e pedagóxica, destacando “a importancia de achegar a música e a cultura aos máis pequenos desde idades temperás, fomentando ao mesmo tempo valores como o respecto, a convivencia e a aceptación da diversidade”. Este espectáculo tamén se celebrou no CEIP Mestre Valverde Mayo, no CEIP Atín, no CEIP Peña de Francia, no CEIP Petelos, no Colexio Hogar e no xa mencionado CEIP Mestre Martínez Alonso.
O espectáculo, inspirado no conto “A oficina dos gatos”, foi adaptado para esta actividade cun formato interactivo e didáctico, permitindo ao alumnado coñecer de primeira man diferentes instrumentos musicais que se imparten na Escola Municipal de Música. A través da historia, afondouse en mensaxes de inclusión e igualdade, poñendo en valor as capacidades individuais de cada persoa.
A composición musical e a interpretación correron a cargo do profesorado da Escola de Música de Torroso, mentres que a narración foi realizada por Damián, logrando captar a atención do público infantil e converter cada sesión nunha experiencia participativa e enriquecedora.
A iniciativa desenvolveuse en varios centros educativos do concello durante o mes de decembro, con dúas sesións adaptadas ás distintas idades do alumnado. Ademais, con motivo destas representacións, o Concello de Mos aproveitou para trasladarlles aos nenos e nenas os seus mellores desexos de Felices Festas, facendo entrega dun pequeno agasallo como peche da actividade.
Desde o Concello de Mos destacan o éxito desta proposta, que reforza o compromiso municipal coa educación, a cultura e a promoción da música como ferramenta de aprendizaxe e cohesión social.
