A escritora Sara Vila presentará as súas obras na Biblioteca Municipal de Salvaterra de Miño

A Biblioteca Municipal de Salvaterra de Miño, dentro das actividades programadas pola concellería de Cultura, acolle o vindeiro día 18 de xaneiro unha presentación das obras de Sara Vila que contará coa presenza da escritora.
O vindeiro sábado ás 12:00 horas na Biblioteca, a escritora de As Neves presentará ós asistentes as súas obras e falará da súa biografía. Sara Vila é xornalista e escritora. En 2019 foi recoñecida co segundo premio Comunicar en Igualdade 2019 polo artigo “O noso toque de queda”. Como autora literaria, en 2016 logrou o primeiro premio no Certame de Relatos Curtos Os Viadutos de Redondela por “Adeus, María”. Publicou a súa primeira novela, “Oito días sen Eva Cortes”, tras gañar o Premio Illa Nova de Narrativa 2021. Coa súa segunda novela “O incendio” conseguiu o XLII Premio Eduardo Blanco Amor, precisamente o Club de Lectura da Biblioteca de Salvaterra ven de rematar a lectura desta obra.
Por todo isto, esta é unha gran oportunidade para poder coñecer de preto á escritora, a súa obra e poder charlar sobre o seu traballo.