o Co fin de axilizar o procedemento, o Departamento de Servizos Sociais citará vía telefónica aos participantes para esoller destino por orde de entrada das súas solicitudes
O Departamento de Servizos Sociais, que dirixe Amalia Goldar, vén de facer públicas as 325 prazas das que se poderán beneficiar os/as estradenses inscritos no programa de Vacacións para Maiores do Imserso, co que colabora o Concello da Estrada, durante a tempada 2022/2023.
A edil de Benestar Social, Amalia Goldar, explicou que esta cifra “supón un aumento considerable con respecto ao ano anterior debido a que tamén se incrementou o número de solicitudes, cun total de 326”. Neste senso, engadiu que “aínda que se concedeu unha praza de menos”, todos/as os/as participantes que desexen viaxar terán garantida a súa, xa que “á hora de escoller destinos sempre hai renuncias”.
Co fin de axilizar o procedemento para a elección de destino, que deberá estar rematado antes do vindeiro 3 de outubro, o persoal do Departamento de Servizos Sociais do Concello porase en contacto vía telefónica con cada solicitante seguindo a orde de de entrada no Rexistro e serán citados no concello para recoller a carta informativa coa oferta de destinos, datas e prezos, para que realicen as súas reservas.
Os maiores do municipio poderán viaxar durante a tempada 2022/2023 a Fuengirola, Peñíscola, Tenerife, Gandía, Mallorca, Tarragona, Valladolid, Almería, Mallorca, Salou e Gran Canaria. Peñíscola, con 51 prazas; Fuengirola, con 50; e Almería, con 44; son os destinos que concentran unha maior cantidade de prazas. En canto aos prezos con subvención, sitúanse entre os 212,96 euros e os 405,53 euros.
