• NUMEROSOS EXPOSITORES MOSTRAN OS SEUS PRODUTOS EN FUNCIONAMIENTO NAS SÚAS PARCELAS OU NUNHA ZONA HABILITADA PARA ISO, CO OBXECTIVO DE QUE OS VISITANTES PODAN COMPROBAR AS SÚAS PRESTACIÓNS
• ESTE CERTAME CELÉBRASE DESDE ONTE E ATA MAÑÁ NUN LUGAR REAL DE TRABALLO QUE PERMITE REALIZAR ESTAS EXHIBICIÓNS, O MONTE DO CENTRO DE FORMACIÓN E EXPERIMENTACIÓN AGROFORESTAL DE SERGUDE (BOQUEIXÓN, A CORUÑA)
A sétima edición do monográfico forestal Galiforest Abanca, a cal se celebra desde onte e ata mañá no monte e instalacións do Centro de Formación e Experimentación Agroforestal de Sergude (Boqueixón, A Coruña), acolle numerosas exhibicións de maquinaria e sistemas que se repiten en distintas ocasións durante o certame, sumando en total preto de duascentas. Unha cifra que supera as 180 que se levaron a cabo na pasada edición, celebrada en 2022.
Estas demostracións intensifícanse hoxe no certame, tendo lugar nunha zona do monte habilitada para iso ou ben nas propias parcelas das empresas expositoras. Así, os visitantes están a ver na xornada de hoxe exhibicións de, entre outras, procesadoras forestais e de leña, astilladoras de troncos, serradoiros portátiles, trituradoras, biotrituradoras de restos vexetais e de poda, raxadoras, manipuladoras, motoserras, sistemas automáticos de bloqueo e liberación de estacas, tensores automáticos, robots desbrozadores e robots segadores, simuladores de maquinaria forestal, básculas para guindastres forestais e solucións innovadoras para plantación mecanizada, loita contra incendios, maquinaria especializada e análise de datos a través de conexión remota.
Así mesmo, lévanse a cabo nesta xornada demostracións de traballos en altura, tableado de tronco de serradoiro, limpeza e reciclaxe de cadros, experimentación con cepas de alnus glutinosa resistentes a phytophthora alni no río, cultivo de shitake, pleurotus ostreatus e ganoderma lucidum en ecolóxico, fabricación de alimento sólido para abellas ou ferramentas para descorche de sobreira.
A realización destas demostracións de maquinaria, sistemas e procesos forestais nun lugar real de traballo é un dos principais atractivos que ofrece o monográfico, tanto para os expositores, que poden mostrar o funcionamento das súas máquinas e sistemas, como para os visitantes profesionais, os cales teñen a posibilidade de comprobar in situ as vantaxes e posibilidades que estas lles ofrecen para o desempeño da súa actividade. Ademais, constitúe a razón de que o evento se celebre fóra das instalacións da Feira Internacional de Galicia ABANCA, organizadora do certame coa o apoio da Xunta de Galicia.
Exhibicións máis lúdicas
Por outra banda, o programa de Galiforest Abanca 2024 acolle outras exhibicións máis lúdicas, as cales tamén están a ter lugar hoxe, como figurismo (tallado e realización de esculturas en madeira con motoserra) ou espectáculos de trepa.
