Actuaron no festival benéfico, que durou preto de 5 horas, Manoele de Felisa, Sara e Sofía, Son das Tabernas, Acordes Son do Verdugo, Arte Maña, Cuatro Acordes e Desconcerto
A “Gala Solidaria todos con Gustavo Dacal” celebrada onte no salón de actos do Colexio Cordo Boullosa permitiulle á sociedade civil pontecaldelá recadar uns 4.000 euros que irán destinados a axudar na recuperación do deportista de Baltar (Ponte Caldelas), ex campión de España e ex plusmarquista nacional de lanzamento de xavelina afincado en México.
O público ateigou por completo o salón de actos no que tivo lugar o festival benéfico promovido polas asociacións veciñais, culturais, deportivas e comunidades de montes de Ponte Caldelas, Cáritas e a asociación de empresarios COEMPO e que estivo protagonizado polas actuacións de Manoele de Felisa, Sara e Sofía, Son das Tabernas, Acordes Son do Verdugo, Arte Maña, Cuatro Acordes e Desconcerto, que actúan de xeito totalmente altruísta e gratuíto.
A Gala prolongouse por espazo de casi 5 horas magníficamente dirixida polos presentadores do evento, Elvira Crespo e Pepe Cal, que foron intercalando unha pequena reseña sobre os artistas que interviñan con anécdotas, sorteos de diversos agasallos doados para a ocasión e a proxección dun emotivo vídeo de Gustavo Dacal saudando aos seus veciños e agradecendo as mostras de solidariedade recibidas, especialmente este festival benéfico.
EMOTIVA MENSAXE DESDE MÉXICO
No vídeo facilitado pola súa irmá Ángeles, Gustavo Dacal apareceu no seu domicilio con bo aspecto e coa forza vital que o impulsou ao longo da súa carreira deportiva e que será o combustible que o leve a superar as secuelas da enfermidade que padece. Dacal agradeceu tanto a organizadores, establecementos comerciais colaboradores, artistas, insititucións e público en xeral a preocupación por el e a implicación para axudarlle nestes momentos tan delicados.
Gustavo Dacal fixo gala nese vídeo do seu cariño e amor por Ponte Caldelas a quen dixo con orgullo pertencer e que sempre pertencería e fixo votos para regresar canto antes á súa casa e poder agradecer persoalmente a todos e cada un dos colaboradores neste evento a súa participación solidaria.
Entre o público estaba tamén a súa nai, Lealdina Martínez, quen agradeceu en nome propio e da súa familia “todo o que estades a facer polo meu fillo”. Visiblemente emocionada recibiu un prolongado aprauso que arroupou a súa presenza ao longo da celebración da Gala.
Moitas foron as persoas colaboradoras e os presentadores foron citando, un a un en diferentes quendas, aos establecementos colaboradores co cartel da Gala Solidaria e fixeron tamén mención especial ao traballo desenvolvido polo propietario do establecemento de hostalería Jamarte, encargado de poñer o son a este evento benéfico e a Foto Alameda, que realizou un vídeo da Gala. Tamén se agradeceu ao historiador Buenaventura Aparicio a doazón de dous exemplares do seu libro “Ponte Caldelas hace 100 años”, que foron sorteados entre o público ao igual que varias roscas doadas por Panadería Toño, de Cuñas.
Finalmente, os organizadores (representantes da sociedade civil e das entidades asociativas do municipio) subiron ao escenario e recibiron o aplauso e o agradecemento dos presente ao igual que as compañeiras e compañeiros que fixeron labores loxística, cobro de entradas e, sobre todo, ás Mulleres Rurais do Verdugo que fixeron un saboroso chocolate que serviu para repoñer forzas durante a celebración desta Gala que rematou ben pasadas as 12 da medianoite.
