Esta mañá a praza de Avelino Vicente acolleu a presentación da XXX Festa do Mexillón e do Berberecho de Vilanova de Arousa. Moitos guardeses e guardesas achegáronse a degustar os petiscos que preparou o alumnado do obradoiro Mar de Santiago.
O alcalde de Vilanova de Arousa, Gonzalo Durán, destacou a calidade do menú que preparan e tamén da súa relación coa Guarda, que visita con frecuencia. O alcalde da Guarda, Roberto Carrero, recordou a acollida que deron en Vilanova de Arousa á presentación da Festa da Langosta e como se converteu en todo un éxito que seguro que se repite coa Festa do Mexillón.
Ademais, o acto contou con varios invitados de honra, como os presidentes das cámaras municipais de Vilanova de Cerveira, Rui Teixeira, e de Valença, José Manuel Carpinteira. Mais tamén coincidiu coa visita do alcalde de Santa Tecla (El Salvador), Henry Flores, cidade que conta con case 200.000 habitantes.
A XXX Festa do Mexillón e do Berberecho celebrarase en Vilanova de Arousa, durante a segunda fin de semana do mes de agosto e contará con actuacións como Panorama.
