Representantes do grupo de participación infantil e xuvenil do Rosal participaron neste encontro no Parlamento de Galicia xunto con integrantes de consellos locais doutros municipios
O grupo de participación infantil e xuvenil do Rosal fixo hoxe de altofalante da mocidade rosaleira no XII Foro Infantil de Unicef do Parlamento de Galicia, un encontro celebrado este martes en Santiago de Compostela no que compartiron experiencias con nenos, nenas e adolescentes dos consellos locais de participación da Laracha, Vivero, Burela, Teo, Moaña, Tui, Nigrán, Ponteareas, Moeche e Tomiño.
Acompañadas e acompañados pola alcaldesa, Ánxela Fernández Callís, e pola concelleira de Voluntariado, Beatriz Rodríguez, as rapazas e rapaces rosaleiros compartiron as súas vivencias, as súas propostas e as súas preocupacións sobre como debe ser unha participación real, efectiva e segura.
Durante o encontro, Elda, en nome dos seus compañeiros e compañeiras, destacou a obriga das persoas adultas que traballan con todas e todos eles neste proceso de participación de “tomar as medidas necesarias para minimizar os perigos e crear un espazo onde nos sintamos seguras e seguros”. E para conseguilo recalcaron a importancia da formación específica “para que as persoas que traballan con nós coñezan os nosos dereitos e os enfoques dende onde se debe traballar para poder promover unha participación real”.
Unha participación que, como expuxo no Parlamento galego a rapazada rosaleira, debe contar coa rendición de contas, un paso “clave para que a nosa participación non sexa simbólica. Cando presentamos unha proposta é imprescindible que saibamos canto tempo vaise tardar en poñer en marcha, como se vai facer ou se non é viable e por que”.
O encontro estivo presidido polo presidente do Parlamento de Galicia, Miguel Ángel Santalices, que agradeceu a todas as mozas e mozos a súa participación e compromiso para facer dos seus municipios lugares cada día mellores e destacou a necesidade de fortalecer as campañas de concienciación a favor da saúde mental de nenos e nenas.
