Foi elexida por unanimidade Responsábel Local, con Anabel Gulías como Vice-responsábel
Sabela Bará é a nova responsábel do BNG en Pontevedra. Elexida por unanimidade, a nova responsábel local encabezaba a única candidatura presentada, unha candidatura que, nas súas palabras, “busca representar o conxunto da militancia, con presenza de persoas dos diferentes barrios e parroquias, que participan en movementos sociais e culturais e tamén de distintas idades. Combina persoas con moita experiencia dentro do BNG con outras que contan cunha militancia máis recente, mais cunha participación activa e que dan o paso de implicarse no traballo organizativo. É unha suma de diferentes perfís que pretende enriquecer o proxecto do BNG”.
A nova responsábel local agradeceu a todas as persoas que deron un paso adiante ao formar parte deste proxecto, así como a todas aquelas que traballaron no último Consello Local, comezando polo anterior responsábel, Demetrio Gómez, polo seu traballo nos últimos anos, nun período complexo, marcado por “tantas convocatorias electorais”.
Sabela Bará agradeceu o apoio da militancia e manifestou o “orgullo de poder presentar esta candidatura e facelo nunha localidade na que o BNG leva máis de 25 anos no goberno. É unha gran responsabilidade asumir os retos que temos por diante neste período, no que o grupo municipal, o Consello Local e toda a militancia temos que camiñar da man para que o BNG continúe a construír unha Pontevedra mellor”.
Un dos obxectivos deste período, será “convocar e escoitar a militancia con maior frecuencia. A militancia é o principal valor do BNG, somos os ollos, as orellas e as mans nos nosos barrios e parroquias, nas asociacións e nos movementos sociais e culturais dos que participamos. E ese gran valor ten que ser fundamental para apoiar todo o traballo que se desenvolve dende o goberno municipal. Tamén para que o proxecto do BNG chegue a maior cantidade de espazos e persoas posibles”.
Para lograr unha maior operatividade, conformouse unha Executiva Local de seis persoas que se encargará de coordinar o traballo máis inmediato e establecer unha liña de comunicación continua co goberno municipal.
