Fran Devesa: “organizamos este encontro porque consideramos necesario sacarlle todo o partido á gran riqueza forestal e agraria que temos en Valga”
O sector forestal e agrario ten un gran peso específico no concello de Valga, e, pois iso, desde o BNG consideramos que é necesario darlle un “novo impulso para sacarlle todo o proveito económico e social”, dixo o candidato á alcaldía de Valga, Fran Devesa.
Con este obxectivo o BNG puxo en marcha un encontro o vindeiro xoves, 4 de maio, ás 19.30 h. na Sala Vermella do Auditorio Municipal de Valga (Cordeiro), que serva para dialogar co sector e buscar as mellores formas de potenciar un sector económico vital para Valga. “Queremos convidar expresamente a todo o sector produtivo vinculado á agricultura e ao monte para, entre todos e todas, buscar a mellor forma de aproveitar todas as grandes potencialidades que ten Valga nestes ámbitos, que son moitas”, dixo Fran Devesa.
Trátase dun encontro multidisciplinar, no que se abordará o aproveitamento multifuncional do monte, a cargo de ovidio Queiruga, presidente da comunidade de montes de Baroña, o valor engadido da transformación da madeira, a cargo de Francisco Pedras, técnico experto na cadea de valor da madeira, e as potencialidades e alternativas agrícolas de Valga (D.O. Pemento de Herbón, I.X.P. Viño Terras de Barbanza e Iria, Caña do País…), a cargo de Miguel Lois, enxeñeiro técnico agrícola e candidato número 2 do BNG en Valga.
“Vimos a expoñer as nosas ideas e propostas para sacar o maior proveito aos nosos recurpos, pero tamén a escoitar as demandas, as inquedanzas e as propostas das persoas involucradas directa ou indirectamente no ámbito forestal e agrícola, afirmou o candidato nacionalista, para quen “o diálogo sempre enriquece. Escoitar e contrastar as propostas é algo que sempre fixen sempre farei, e quero que sexa marca distintiva dun goberno BNG no concello de Valga”.
“Valga precisa sair da inercia e a rutina na que está instalada, é necesaria iniciativa, impulso,e novas ideas para que poidamos avanzar como sociedade. E esta é unha reunión para poñer en común propostas que redunden nun maior benestar e nunha maior riqueza para os nosos veciños e veciñas”, concluíu Fran Devesa.
