- Trátase dun desfile tradicional representando as Festas de San Pedro deste municipio portugués
O Concello da Guarda acolle este sábado un desfile moi especial, o da “Rusga da Póvoa”. Trátase dun desfile dun grupo tradicional do municipio portugués Póvoa de Varzim que se achega á Guarda para representar as Festas de San Pedro da súa localidade.
Un grupo de 45 persoas, entre bailaríns e músicos, desfilarán polo Porto da Guarda e actuarán no Auditorio de San Benito, onde os asistentes tamén poderán probar os doces típicos da Póvoa de Varzim, a rabanada poveira.
Todo isto comezará as 16:30h da tarde deste sábado 14 de xuño. Deste xeito, os guardeses poderán coñecer de preto a identidade poveira, tradición e espírito das festas dos veciños portugueses de Póvoa de Varzim. Desde logo, o desfile e actuación chamará a atención de residentes e turistas polo colorido e espectacularidade dos seus traxes e marchas.
Deste xeito, coñeceremos máis de preto as tradicións dos nosos veciños portugueses, así como a súa gastronomía e os seus bailes. O alcalde da Guarda, Roberto Carrero, resalta que “é un xeito marabilloso de descubrir as festas desta cidade de Póvoa de Varzim, con quen cada vez temos máis lazos”.
Sobre Póvoa de Varzim
Póvoa de Varzim é unha cidade portuguesa do distrito de Oporto con máis de 64.000 habitantes. A festa de San Pedro é a súa principal festa, xa que é o patrón da cidade e o santo pescador. Para esas datas, na noite do 28 ao 29 de xuño, a poboación reúnese en festa, bailando e comendo sardiñas asadas nas fogueiras. Os barrios tradicionais compiten entre si nas “rusgas” e na creación dos tronos de San Pedro.
