En coordinación co Consistorio sanxenxino, terán lugar os vindeiros xoves 2 e venres 3 de setembro de 9 a 14 horas en horario de mañá e de 16 a 21 horas polas tardes
A Administración Sanitaria Pública galega vai convocar por SMS a 3.500 habitantes dentre 15 e 39 anos desta localidade con tarxeta sanitaria activa no Concello
As mostras con PCR nasofarínxea tomadas en Sanxenxo procesaránse no servizo de Microbioloxía do Complexo Hospitalario Universitario de Pontevedra e os resultados negativos serán comunicados por SMS mentres que os casos positivos notificaránse de xeito individual a cada cidadán
A Xunta de Galicia, a través da xestión do Servizo Galego de Saúde, continúa a presente semana con novos cribados poboacionais con PCR nasofarínxea na Área Sanitaria de Pontevedra e O Salnés cara a detectar o maior número posible de portadores asintomáticos, o que permitirá reducir a cifra de contaxios de coronavirus.
Deste xeito, en coordinación co Consistorio de Sanxenxo, a Sala Nauta desta localidade acollerá novos cribados voluntarios con PCR os vindeiros xoves 2 e venres 3 de setembro, de 9 a 14 horas en horario de mañás e de 16 a 21 horas polas tardes.
Para levar a cabo estes cribados, a Administración Sanitaria Pública galega contará na Sala Nauta sanxenxina con dous equipos de enfermaría por cada turno, que efectuarán tarefas de control e cumprimento das medidas de seguridade, realización das tomas de mostras e información aos usuarios.
Convocatoria a 3.500 sanxenxinos dentre 15 e 39 anos
Á dita iniciativa preventiva, a Área Sanitaria de Pontevedra e O Salnés vai convocar por SMS a 3.500 habitantes dentre 15 e 39 anos de Sanxenxo con tarxeta sanitaria activa nesta localidade.
Todas as mostras tomadas con PCR nasofarínxea no Concello de Sanxenxo os vindeiros xoves e venres procesaránse no servizo de Microbioloxía do Complexo Hospitalario Universitario de Pontevedra e os resultados serán comunicados aos usuarios por SMS, sempre que estes sexan negativos.
No caso de resultar positivos, estas notificacións comunicaránse de xeito individual a cada cidadán.
