Manuel Fariña “Non podemos permitir que o PP estrague unha sanidade pública que tanto tempo e loita levou conquistar. As veciñas e veciños de Caldas, Cuntis, Moraña e Portas non nos merecemos o desprezo do SERGAS e non imos quedar calados”
Os centros de saúde dos concellos de Caldas de Reis, Cuntis, Moraña e Portas están baixo mínimos, e o deterioro na atención sanitaria resulta máis que evidente. O feito de non cubrir baixas e vacacións, e que o persoal médico teña que desprazarse fóra do centro de saúde para atender a pacientes que o necesitan, levan a que día si, día tamén, os centros de saúde queden sen médico durante horas, coas conseguintes colas de veciños e veciñas que precisan ser atendidos ás portas dos centros de saúde.
Se a situación para a poboación xeral é moi grave, para os nenos e nenas é pior. Sen pediatra en ningún dos catro concellos, fan que as nais e pais se vexan na obriga de levar ás súas crianzas a unhas urxencias xa de por si saturadas, o que fai que moitas veces teñan que desviarse ás urxencias hospitalarias de Montecelo que, como é coñecido están ao borde do colapso.
“Desde o BNG -afirmou Fariña- non imos consentir este atropelo ao noso dereito á saúde, e instamos á Xunta do PP a que deixe de botar balóns fóra e actue dunha vez por todas. Este non é un problema que xurda da nada, ten a súa orixe en 13 anos de políticas de recortes do PP, e compre actuar con dilixencia para mudar esa política suicida que deteriora gravemente a nosa sanidade pública, e polo tanto o dereito á saúde dos veciños e veciñas de Caldas, Cuntis, Moraña e Portas.