- O club conta con máis de 100 deportistas distribuídos en equipos de todas as categorías
- A Sociedade Deportiva Pazos presentará este sábado aos veciños de Pazos de Borbén todas as categorías do club. Unha xornada festiva na que os máis de 100 deportistas que integran o club faranse a fotografía oficial da tempada, pasando así de forma oficial á historia do club e recibindo ao apoio dos seus veciños e familiares.
- A presentación comezará ás 16:30 horas co desfile de todos os membros das categorías inferiores e finalizará ás 19:00 horas coa celebración do partido correspondente á Terceira División na que milita o equipo senior. Encontro que enfrontará aos actuais líderes da competición, o equipo local e o SD Xove.
- Actualmente o club conta con máis de 100 deportistas entre os equipos senior, sub-23, xuvenil, infantil, alevín, benjamín e biberón. “Este será un día de festa. As categorías inferiores son a base de calquera club, é o que marca o seu futuro e o que permite dar a oportunidade a veciños de todas as idades de competir e gozar do deporte”, explicou o presidente da SD Pazos, Manuel Ferreira.
- Do mesmo xeito, Ferreira destacou o gran ambiente e unión entre todos os membros do club como clave do éxito do equipo. “Somos unha gran familia. Desde os biberóns ata os seniors, todos reman na mesma dirección porque se algo ten este club é un gran sentimento de pertenza”, finalizou o presidente.