A vicepresidenta da Deputación de Pontevedra, Luisa Sánchez, presentou no Pazo de Rubiáns o X Torneo Cidade de Vilagarcía, que acollerá a cidade os vindeiros 28 e 29 de marzo. “Faime especial ilusión participar neste acto que supón o meu estreo como vicepresidenta provincial e, sobre todo, como deputada delegada da área de Deportes. Así que, desde xa, aproveito esta ocasión para amosar a miña disposición con todos vós, con todos os clubs e entidades e con todos os deportistas da provincia”, remarcou Sánchez.
Para a vicepresidenta o X Torneo Cidade de Vilagarcía, “convirte a Vilagarcía na capital do fútbol de formación” e permite que “poidamos desfrutar dun fútbol de altísima calidade da man dos alevíns, o futuro deste deporte”. Tamén subliñou o feito de que a edición deste ano conte con Claudio Silva como “padriño de luxo” e felicitou ao Arosa SC “polo voso traballo e constancia na organización deste torneo” e “por estes case 80 anos que levades apostando polo deporte rei desde a base”.