• Cubela ensalzou os 55 anos en activo do músico, oito dos cales tocou na compaña do mítico Ricardo Portela, o gaiteiro de Viascón
A VIII Festa do Pan de Millo e do Ovo de Cotobade serviu de marco para reivindicar e homenaxear a figura de Secundino Míguez “Tinolo”, un veterano gaiteiro que levaba máis de 55 anos de actividade, oito dos cales tocou na compaña do mítico Ricardo Portela.
O acto contou coa presenza de Jorge Cubela, os concelleiros Pepe Pichel, Fernando Vázquez, Lourdes Ovelleiro e membros da Corporación Municipal así como directivos da Asociación Cultural Foula, organizadora deste evento gastronómico e musical no transcurso do cal o edil de Tenorio, Pepe Pichel, entregoulle a “Tinolo” unha figura de Sargadelos en agradecemento polo seu traballo a prol do folclore galego ao longo de máis de medio século.
Este evento gastronómico organizado pola Asociación Cultural Foula e que conta coa colaboración do Concello de Cerdedo-Cotobade, volve a celebrarse despois do parón obrigado pola pandemia da Covid-19 coa intención de despachar máis dun milleiro de ovos fritidos con pan de millo desmigado para servir durante toda a xornada aos comensais que ata alí se acheguen.
Ademais do atractivo gastronómico desta festa, que chega á súa oitava edición, tamén mantén o seu interese desde un punto de vista musical e folclórico coa participación de importantes agrupacións que animarán o certame durante toda a xornada.
ACTUACIÓNS MUSICAIS DURANTE TODA A XORNADA
Así, ás 13 horas interviron coa súa música os Gaiteiros das Rías Baixas, ás 15 horas tomaron o relevo as Pandereteiras do Val de Quireza, mentras que ás 16 horas tocaralle á Banda de Música de Tenorio.
Ás 18 horas terá lugar a sesión infantil con Magín Blanco e ás 20 horas actuará Metalxis. Unha hora máis tarde, ás 21 horas, tocaralle o turno a Os D`Arbo e pechará a xornada festiva o Bruxo do Río facendo unha queimada de balde.
