As actuacións musicais de Milladoiro e de Aires de Cobres alentaron os picos de maior afluencia de público á carpa de Riomaior
Unha facturación superior aos 50.000 euros; máis de 1.000 botellas de viño vendidas e posiblemente unha cantidade similar comercializada en copas; 1.500 racións de polbo, churrasco, empanada e postros e 900 refrescos conforman o balance en cifras da X Festa do Viño de Vilaboa; uns datos que, segundo indica o goberno local, corroboran tanto o éxito desta edición como o arraigo do evento na contorna.
Na Festa do Viño, celebrada a principios de maio a elección do próprio sector buscando unhas temperaturas axeitadas para a degustación dos caldos, participaron 7 colleiteiros locais e 3 adegas; que estiveron reforzadas na carpa por un posto de comida (polbo e churrasco) e unha pastelería-panadería dándolle á Festa un ambiente de romería propicio para degustar os viños de máis dun stand. Un establecemento hostaleiro local encargouse tamén da venta de refrescos e catro artesáns aportaron o toque artesanal, completando a oferta das casetas a de información sobre Igualdade e Turismo do Concello, donde tamén se facilitaban os cataviños serigrafiados para a ocasión; usáronse un total de 978.
Os momenntos de maior afluencia de público a Festa coincidiron coas actuacións musicais de Milladoiro e Aires de Cobres, dous estilos musicais diferentes pero ambos demostraron a súa capacidade de arrastre en Vilaboa.
En canto á parte profesional, o goberno local, encargado da organización do evento, programou dúas catas, unha para adegueiros e outra para colleiteiros, nas que participaron 5 catadores e actuou de secretario José Manuel Fernández, de Medio Rural e nas que se otorgaron 7 premios nas diferentes categorías.
Carmen Gallego, concelleira de Dinamización Económica, explica que nesta edición o habitual pregón do evento foi sustituido por un recoñecemento especial ás dúas persoas que puxeron en marcha este evento. “Quixemos facelo aproveitando a décima Festa, que durante os dous anos de Covid non se organizou”. Luis Poceiro, alcalde de Vilaboa no ano 2011 e Xabier Míguez, concelleiro de área daquel goberno, “apostaron pola promoción dun sector económico clave para Vilaboa”, apunta. Ambos recibiron do alcalde, César Poza, un agasallo como símbolo do recoñecemento social a “unha aposta atrevida naquel momento e que derivou hoxe nun evento convertido en escaparate da calidade dos nosos viños”.
Á hora de valorar a incidencia económica da Festa, Carmen Gallego indica que na loxística participaron varias empresas da provincia que suministraron a carpa, a electricidade, o son, stands, seguridade, ambulancia, rotulación, cartelería, pancartas e insercións publicitarias. O goberno local agradece tamén a implicación da plantilla municipal que se encargou dos suministros de auga, luz, montaxe e desmontaxe das casetas, deseño de cartelería e contratación dos servizos; así como da Policía Local para a sinalización e control de acceso, apoiado polos voluntarios de Protección Civil.
Carmen Gallego agradece tamén o comportamento da cidadanía que respondeu exemplarmente ao chamamento a non empregar o vehículo particular para achegarse ao recinto. “Non tivemos atascos, aglomeracións nin incidente algún que salientar”, indica.
