O equipamento ten agora un novo sistema de iluminación e baños adaptados tras un investimento de 25.000 euros
O xerente do Consorcio Galego de Servizos de Igualdade e Benestar, Perfecto Rodríguez, visitou hoxe o centro de día das Neves, pertencente á rede pública autonómica e con capacidade para dar servizo a 25 persoas maiores. A Xunta financiou con 25.000 euros obras de mellora neste equipamento para renovar o seus interiores e corrixir deficiencias, e foron executadas polo concello.
Perfecto Rodríguez, que estivo acompañado do alcalde do concello, José Manuel Alfonso González, destacou a importancia da colaboración entre institucións para poñer á disposición das persoas usuarias e das súas familias as mellores instalacións. Neste sentido, as actuacións levadas a cabo consistiron na substitución das fiestras do tellado para previr filtracións de auga. Así mesmo, mellorouse a iluminación das instalacións e pintáronse as parades interiores con cores máis claros para dotar ao espazo de máis claridade. Os traballos tamén incluíron a renovación dos aseos adaptados para mellorar a accesibilidade.
O xerente do Consorcio explicou que estas intervencións teñen como obxectivo dar resposta as deficiencias que presentaba o centro e adaptalo ás necesidades dos usuarios. Así, Perfecto Rodríguez sinalou que a Xunta supervisa periodicamente os recursos para garantir o seu correcto funcionamento e ofrecer un servizo de calidade.
