A directora xeral de Administración Local, Natalia Prieto, comprobou as melloras realizadas grazas ás axudas da Orde de Infraestruturas de uso público
O concello de Ribadumia ten recibido nos últimos anos mais de 800.000 euros de varias axudas da Vicepresidencia
A directora xeral de Administración Local, Natalia Prieto, acompañada do delegado territorial da Xunta en Pontevedra, Luis López, comprobou hoxe no concello as actuacións de mellora de infraestruturas, dotacións, instalacións e equipamentos en servizos municipais que contaron cunha achega da Xunta de preto de 35.000 euros ao abeiro da Orde de Infraestruturas de uso público.
Natalia Prieto puido comprobar o resultado das actuacións levadas en instalacións deportivas de uso público e da dotación de equipamentos nas referidas instalacións,como a reforma do subministro eléctrico no campo de fútbol de Barrantes e reforma do subministro eléctrico no preescolar do C.P.I. Julia Becerra Malvar. O concello conta tamén con material deportivo para o ximnasio de Cabanelas, padiola para o posto de primeiros auxilios na piscina municipal, tatami para o ximnasio de Barrantes así como unha portería de fútbol para o campo de fútbol de Barrantes
Tal e como indicou a directora xeral, pequenas actuación que redundan en beneficios para a veciñanza. Destacou tamén a importancia da colaboración entre a administración autonómica e a local, que é a mellor coñecedora das necesidades e demandas da veciñanza, xa que grazas a estas axudas, os concellos galegos levan a cabo actuacións que repercuten en melloras directas para o día a día dos cidadáns e que non se poderían levar a cabo en moitas ocasións se non fose pola colaboración entre Xunta e concellos.
O concello de Ribadumia ten recibido nos últimos anos mais de 800.000 euros de varias axudas da Vicepresidencia. Ademais recibiu tamén este ano unha axuda conxunta coa Mancomunidade Municipal Voluntaria do Salnés para unha instalación solar fotovoltaica de autoconsumo instantáneo na estación de tratamento de case 84.000 euros do Fondo de Compensación Ambiental
