O deputado nacionalista Luís Bará censura o desleixo do goberno galego e do concello de Cuntis na tramitación desta iniciativa, paralizada desde 2014
Luis Bará: “Estase perdendo unha grande oportunidade para protexer e poñer en valor as termas romanas de Cuntis”
O BNG trasladou hoxe á comisión de infraestruturas e medio ambiente unha batería de preguntas relacionadas coa declaración do patrimonio termal de Cuntis como Ben de Interese Cultural. Luís Bará lembrou que o pasado mes de marzo o parlamento aprobou por unanimidade instar á Xunta a incoación do expediente BIC e preguntou á Directora Xeral cales eran as previsións da Xunta ao respecto, así como polas razóns de que esta iniciativa estea paralizada desde 2014.
O deputado nacionalista censurou o desleixo da Xunta e concello en relación con esta iniciativa, que foi aprobada polo pleno do concello en abril de 2014. Segundo a directora xeral o concello achegou en 2015 a documentación en formato dixital mais como non era lexibel solicitoulle ao concello o envío da documentación en papel, sen que o concello chegara a enviala.
Posteriormente procedeuse a incluir no catálogo de bens patrimoniais o casco histórico de Cuntis e as termas de orixe romana.
No ano 2022 a Plataforma en Defensa do Patrimonio Termal de Cuntis enviou á Xunta un amplo dossier informativo sobre o patrimonio termal, que a directora xeral se comprometeu a estudar e tramitar. Afirmou que sería necesario que o concello aclarase que modalidade de ben de interese cultural considera máis acaída, polas diferentes implicacións de cada unha delas.
Denuncia de actuacións irregulares na burga da rúa Real
O BNG fíxose eco das actuacións irregulares levadas a cabo en 2022 na burga da rúa Real, catalogada por patrimonio cultural. Segundo as denuncias formuladas pola Plataforma en defensa do patrimonio termal, na primavera de 2022 leváronse a cabo obras sen informes e autorizacións da consellaría de Cultura. A directora xeral comprometeuse a informar sobre as actuacións realizadas e a intervención nelas do seu departamento.