Esta iniciativa preventiva terá lugar durante a tarde de mañá venres 19 de febreiro, así coma a mañá do sábado 20 de febreiro
A Xunta de Galicia, a través da xestión do Servizo Galego de Saúde, efectuará no centro de saúde de Mosteiro, no Concello de Meis, entre a tarde de mañá, venres 19 e a mañá do vindeiro sábado 20 de febreiro de 2021 novos cribados poboacionais con test rápidos de antíxenos cara a detectar o maior número posible de portadores asintomáticos de COVID 19, o que permitirá reducir a cifra de contaxios de coronavirus nesta localidade.
Á dita iniciativa preventiva a Administración Sanitaria Pública galega vai convocar, gradualmente e vía SMS telefónico, á poboación de Meis dentre 30 a 60 anos de idade con tarxeta sanitaria activa no centro de saúde deste Concello, colectivo que nesta localidade acada as 1.658 persoas.
Para levar a cabo este cribado, a Área Sanitaria de Pontevedra e O Salnés contará a partires das 15:30 horas de mañá no centro de saúde de Mosteiro con tres equipos de enfermaría en cada turno, que efectuarán tarefas de control e cumprimento das medidas de seguridade, realización e procesado das tomas de mostras nasofarínxeas e información aos usuarios.
Comunicación dos resultados
Os resultados negativos destes cribados a efectuar mañá e pasado mañá no centro de saúde de Mosteiro serán comunicados por SMS pola Área Sanitaria, mentres que os positivos notificaránse contactando directamente vía telefónica con cada persoa.
