Esta iniciativa preventiva terá lugar durante as mañás e tardes dos vindeiros 3, 4 e 5 de marzo nesta localidade arousá
A Xunta de Galicia, a través da xestión do Servizo Galego de Saúde, efectuará no Pabellón Municipal de Vilanova de Arousa dende mañá mércores 2 e ata o vindeiro venres 5 de marzo de 2021 novos cribados poboacionais con PCR convencional cara a detectar o maior número posible de portadores asintomáticos de COVID 19, o que permitirá reducir a cifra de contaxios de coronavirus nesta localidade arousá.
Á dita iniciativa preventiva a Administración Sanitaria Pública galega vai convocar, gradualmente e vía SMS telefónico, á poboación de Vilanova de Arousa dentre 50 a 64 anos de idade con tarxeta sanitaria activa nos centros de saúde deste Concello, colectivo que nesta localidade acada as 1.734 persoas.
Para levar a cabo este cribado, a Área Sanitaria de Pontevedra e O Salnés contará a partires das 9 horas polas mañás e ás 15:30 horas polas tardes no Pabellón Municipal de Vilanova de Arousa con dous equipos de enfermaría en cada turno, efectuando tarefas de control e cumprimento das medidas de seguridade, realización e procesado das tomas de mostras nasofarínxeas e aportando información aos usuarios.
Os resultados negativos destes cribados a efectuar dende mañá mércores e ata o vindeiro venres 5 de marzo en Vilanova de Arousa serán comunicados por SMS pola Área Sanitaria, mentres que os positivos notificaránse contactando directamente vía telefónica con cada persoa.
44.286 convocatorias preventivas en febreiro
En relación aos cribados, cómpre sinalar que durante o pasado mes de febreiro, a Área Sanitaria de Pontevedra e o Salnés efectuou un total de 44.591 convocatorias preventivas para a detección da COVID 19 entre a cidadanía.
Estes cribados efectuáronse tanto con test de antíxenos coma con PCR en mostras de saliva e PCR en mostras nasofarínxeas.
Ás ditas convocatorias voluntarias efectuadas por toda a xeografía da Área Sanitaria durante o pasado mes asistiron finalmente un total de 31.445 persoas, o que representa unha porcentaxe do 70,5 por cento de presencia nas diversas probas para a detección do coronavirus.
Estes cribados realizáronse nas residencias sociosanitarias, nas que se levaron a cabo 2.147 probas. Tamén se efectuaron en centros educativos, nos que se fixeron 2.259 probas; en empresas e outros colectivos, nos que se realizaron 4.351 probas e na poboación xeral de distintos Concellos, nos que se levaron a cabo un total de 22.688 probas.
Estas 31.445 probas permitiron detectar un total de 81 positivos. Cómpre sinalar que ningún destes positivos se produciu no ámbito sociosanitario.