― O Goberno galego concedeu axudas por un valor de 200.000 euros a esta entidade no ano 2021 para poñer en marcha programas de formación e asesoramento
― Achegáronse un total de 900.000 euros para financiar proxectos e actividades de inclusión social realizados por 15 entidades distintas na cidade de Pontevedra
A Xunta destaca o traballo da asociación Boa Vista, de Pontevedra, na loita pola inclusión Social. O director xeral de Inclusión Social, Arturo Parrado, visitou hoxe as instalacións desta entidade, á que o Goberno galego concedeu axudas por 200.000 euros para a posta en marcha de programas e actividades de formación e asesoramento ás persoas que máis o precisan.
O director xeral sinalou que Boa Vista é unha das entidades coas que a Xunta colabora na cidade do Lérez para promover unha vida con máis posibilidades para as persoas que peor o están a pasar. Neste sentido, apuntou que o Executivo autonómico financiou programas doutras 15 entidades desta cidade durante este ano 2021. En concreto, destinou un total de 900.000 euros a esta finalidade.
Arturo Parrado lembrou a importancia de que a Xunta traballe da man das entidades sociais para facer de Galicia un lugar máis xusto, solidario e igualitario no que vivir. Así mesmo, puntualizou que seguirán apostando por impulsar iniciativas e programas que permitan dar máis posibilidades a quen máis o precisa.
