En total, o importe do videomarcador ascende a 24.000 euros que serán sufragados pola Xunta de Galicia nun 84% (20.000 euros) e polo Concello de Rodeiro no restante 16% (4.000 euros)
O secretario xeral para o Deporte, José Ramón Lete Lasa, acompañado do delegado da Xunta en Pontevedra, Luis López, veñen de visitar o Concello de Rodeiro para a sinatura do convenio de colaboración polo que as administracións autonómica e municipal colaborarán para o subministro e instalación dunha pantalla de videomarcador no pavillón municipal.
En total, o importe do videomarcador ascende a 24.000 euros que serán sufragados pola Xunta de Galicia nun 84% (20.000 euros) e polo Concello de Rodeiro no restante 16% (4.000 euros).
O secretario xeral destacou nas súas verbas a importancia da promoción do deporte en municipios como o de Rodeiro que conta cuns 2.500 habitantes, para que todos os cidadáns e cidadás galegos e galegas poidan desfrutar da práctica deportiva nas mellores condicións e gozar dunha vida activa e saudable. Ao fío desta idea destacou aos primeiros equipos do municipio pontevedrés e, nomeadamente ao Balonmán Rodeiro que realiza un gran labor nas categorías inferiores como demostra a clasificación do equipo infantil feminino por vez primeira para a fase do Campionato de España tras proclamarse subcampioas na Final Four galega.
En total, dos 32.474.216 euros cos que conta a Secretaría Xeral para o Deporte en 2021 (un 28,5% máis que en 2020), 9,15 millóns serán destinados a obras de creación e reforma de infraestrutura deportiva, un 118% máis que en 2020 cando se destinou ao mesmo obxecto 4,2 millóns de euros.
