Cun orzamento de máis de 55.000 euros, aprovéitase o período estival para renovar as instalacións
O xerente do Consorcio Galego de Servizos de Igualdade e Benestar, Perfecto Rodríguez, acompañado dos alcaldes das localidades e doutros membros das corporacións municipais, visitou esta mañá as escolas infantís públicas autonómicas dos concellos pontevedreses de Vilaboa e Bueu. En ambos centros realízanse obras de mellora para renovar as instalacións durante o verán.
Na EI de Bueu, os principais traballos desenvólvense nas áreas de xogo, coa substitución do revestimento actual por un novo de caucho que permitirá a introdución de xogos visuais, mellorará a estética do conxunto e reforzará a seguridade, eliminando os desniveis. Tamén se ampliarán as zonas verdes e se mellorarán os accesos e a circulación polo centro.
Na EI de Vilaboa, as obras consisten na instalación dunha tarima de vinilo de cor clara no interior das aulas e doutras dependencias para igualala coa que xa está instalada no patio interior. Ademais, mellorarase a estética das fachadas e instalarase un dispositivo para aumentar a presión da auga corrente.
A execución das obras corre a cargo dos Concellos, mentres o Consorcio asume o seu financiamento mediante a compensación do importe das liquidacións que ten que aboar a Administración local por este servizo: máis de 36.000 no caso de Bueu e por riba dos 19.000 no caso de Vilaboa.
Gratuidade 0-3
Cun investimento de 60 millóns de euros, o próximo curso será o terceiro no que a Xunta financiará integramente a etapa 0-3 anos nas escolas infantís, tanto públicas como privadas e de entidades sociais. Isto supón un aforro anual, de media, de máis de 3.000 euros ao ano que beneficia a máis de 32.000 familias.
