A XUNTA INICIA A REDACCIÓN DO PLAN BÁSICO MUNICIPAL DE DOZÓN, DOTADA CON 45.000 €
É un dos nove municipios incluídos na segunda fase do impulso desta ferramenta de ordenación, despois de obter a cartografía das 7.405 hectáreas do seu territorio
A Xunta inicia a redacción do plan básico municipal de Dozón. Este municipio forma parte, xunto con Alfoz, Guntín, Samos, Beariz, Lobeira, Punxín, San Cristovo de Cea e Viana do Bolo, dos concellos incluídos na segunda fase para facilitar un instrumento de ordenación básico ás entidades locais.
A Consellería de Medio Ambiente, Territorio e Vivenda acaba de adxudicar os contratos do acordo marco para o servizo de redacción deste instrumento, pensado para os municipios de menos de 5.000 habitantes. O importe no caso de Dozón é de 45.254 euros e o conxunto dos contratos supera os 530.000 euros.
Cómpre lembrar que a financiación dun plan básico municipal é unha das vías da Xunta de Galicia para apoiar ás administracións locais na meta de contar cunha ferramenta que lles garanta unha ordenación responsable e sustentable do seu termo municipal e que está recollida na Lei do solo.
A adxudicación deste contrato é a continuación dos traballos necesarios para obter a cartografía das 7.405 hectáreas deste concello da comarca do Deza, que co resto da segunda fase se unirá á listaxe xa formada por outros nove: Ribeira de Piquín, Riotorto, Trabada, Triacastela, Cartelle, Padrenda, Porqueira e San Xoán de Río; que tomaron como modelo e exemplo o plan básico do Páramo, redacto e impulsado pola Xunta. Estes concellos da primeira fase continúan avanzando na súa tramitación, tras acadar a aprobación inicial.
A Xunta defende que o urbanismo é unha tarefa que precisa do traballo de todos, por iso seguirá ao carón das administracións locais concedendo 3,2 millóns de euros en 2022 en axudas para a redacción dun PXOM ou para a elaboración dun plan básico, tal e como fai cos 18 concellos que apostan polo mesmo, así como prestando o apoio e asesoramento técnico que necesiten.
O obxectivo do Goberno autonómico é acadar que todos os concellos galegos conten cun planeamento que protexa e poña en valor a paisaxe, o territorio e o urbanismo.
