― Achegará un 5% de rebaixa en todos os produtos da tenda aos beneficiarios desta axuda da Consellería de Política Social
― Ademais daqueles sectores como farmacias e supermercados, entre outros, nos se pode facer uso da tarxeta, hai unha decena de establecementos en Galicia nos que se aplican estas vantaxes engadidas
A Xunta de Galicia continúa a incrementar a oferta de establecementos adheridos á Tarxeta Benvida. Moda Infantil Parruliños, situada en Cambados, acaba de asinar un convenio de colaboración coa Consellería de Política Social para adherirse ao programa e ofrecer descontos especiais a todos os beneficiarios desta axuda autonómica.
Deste xeito, ademais de poder facer uso da tarxeta no negocio, achegará un desconto dun 5%. Este comercio non foi o único establecemento que nas últimas semanas se sumou á Tarxeta Benvida, tamén o fixo a tenda La Casita de Valeria, situada na Coruña; Cabezas Mobles de Chantada; MYS Ópticos, en Santiago; e Sneakersnº2, en Ourense. Polo tanto, son agora máis dunha decena de negocios galegos os que ofertan vantaxes aos perceptores desta tarxeta.
A Tarxeta Benvida permite aos seus beneficiarios comprar produtos de hixiene, téxtil, farmacia, parafarmacia, tendas de alimentación, librarías, ópticas e establecementos de puericultura ou especializados en artigos e produtos para a infancia.
Sumarse ao programa
Todo aquel negocio que estea interesado en formar parte desta iniciativa pode encontrar a solicitude de adhesión na páxina web da Consellería de Política Social. Deben engadir todos os datos de interese que require o documento para logo trasladalo á Dirección xeral de Familia, Infancia e Dinamización demográfica a través da Sede Electrónica da Xunta (procedemento PR00A).
