O Concello de Ponteareas informa que xa está aberto o prazo para solicitar as axudas municipais para adquisición de libros e material escolar. O departamento de Ensino, que dirixe Ricardo González, informa que as persoas interesadas que precisen apoio para a tramitación poden achegarse ata a oficina de Ensino no segundo andar da Casa do Concello.
Novidades
Este ano a Concellería de Ensino ampliou o prazo de presentación que remata o 11 de setembro de 2024 para que as familias poidan primeiro mercar o material e os libros e así ter a factura no momento de solicitude da axuda, deste xeito evítase que teñan que facer dúas veces a tramitación. Este ano, ademais, poderase tramitar on line a través do apartado web “axudas e subvencións / Concesión de axudas municipais de apoio ao estudo para o curso 2024/2025”. Ricardo González explica que tamén se incrementou en cinco mil euros máis a partida destinada a estas axudas e anima á cidadanía a facer uso da tramitación a través da páxina web porque permite relacionarse coa administración a calquera hora do día e dende calquera lugar.
Este departamento engade que estas axudas son incompatibles con outras para o mesmo fin e que para ser beneficiaria/o deberán estar empadroados en Ponteareas e cumprir os requisitos recollidas nas bases.
