O alcalde, José Cela, explica que se encargou un proxecto para renovar e ampliar as beirarrúas, crear pasos de peóns elevados e instalar un redutor da velocidade. Investiranse 207.000 euros, cofinanciados entre fondos propios e unha subvención da Deputación de Pontevedra.
O alcalde, José Cela, informou esta mañá do arranque do proceso de licitación do proxecto de mellora da mobilidade na Rúa Doutor Batallán, que cambiará a estética e a seguridade urbana deste vial.
Unha vez remate o prazo para a presentación de ofertas por parte das empresas interesadas, procederase á adxudicación dos traballos, para iniciar as obras.
A actuación prantéxase para os dous marxes da rúa, desde o cruce co edificio do Concello ata chegar ao final do chan urbano, en dirección ao núcleo rural de O Covelo. O que prantexa o proxecto é renovar ambas beirarrúas e amplialas lixeiramente, ademais de crear unha plataforma única no tramo próximo ao cruce coa Rúa 1.
Ademais, colocaranse pasos de peóns elevados no pavimento para dar continuidade a ese ancheamento das beirarrúas e colocarase un badén redutor de velocidade para calmar o tráfico que une Moraña con Caldas.
“O que pretendemos con este proxecto é mellorar a mobilidade urbana do noso centro. Xa temos varias obras en marcha oi xa realizadas que suporán un cambio sustancial aquí en Santa Lucía, como a humanización da Rúa 7, a remodelación da Rúa 6, ou a mellora da Rúa 3, cunha inversión de 370.000 euros”, explicou o alcalde.
“O que facemos agora é continuar con esta batería de proxectos urbanísticos importantes para Moraña, dotando a Doutor Batallán de mellor mobilidade e accesibilidade, eliminando barreiras arquitectónicas”, explica.
Nesta actuación, investiranse 207.014 euros (IVE incluído) por parte dunha subvención da Deputación de Pontevedra, unha cantidade que o Concello complementará cunha partida propia cercana de 40.000 euros.
