O Consello Local do BNG Cambados e o Goberno do Concello de Cambados veñen de acadar un acordo para aprobar os orzamentos municipais do ano 2022. Co apoio do BNG, o Goberno conta con maioría absoluta, co que se garante a súa aprobación.
O acordo inclúe obras de mellora e acondicionamento nas parroquias de Castrelo, Oubiña, Vilariño, e Corvillón; reabrir e volver a organizar actividades nos centros socioculturais das parroquias, fundamentais para favorecer a conciliación laboral dos pais e a sociabilización dos nenos; crear unha liña de axuda en comedores escolares para usuarios en situación de necesidade; e aumento das partidas de actividades e asociacións culturais e deportivas.
Estes non son os orzamentos que nós teríamos elaborado, contan con importantes disfuncións, e seguiremos sinalando as actuacións gubernamentais irregulares ou caciquís en detrimento do conxunto da veciñanza de Cambados.
As concesións acadadas polo BNG favorecen a descentralización das actividades socioculturais, actualmente acotadas a unhas poucas localizacións no centro da vila; e a dotación presupostaria suficiente para executar políticas de esquerdas e populares a prol das clases traballadoras do concello.