O presidente da Xunta foi recibido por veciños e simpatizantes
O presidente do Partido Popular de Galicia e da Xunta, Alfonso Rueda, visitou Arcade esta mañá para mostrar o seu apoio ao candidato á alcaldía, Agustín Reguera, e a todo o seu equipo nas próximas eleccións. Alfonso Rueda estivo acompañado por afiliados, simpatizantes do PP e veciños, que mostraron o seu apoio ao proxecto encabezado por Reguera.
Así, o actual alcalde e candidato recibiu ao presidente da Xunta de Galicia no Peirao de Arcade para despois dar un breve paseo pola contorna acompañada polos membros da candidatura. A continuación, todos xuntos fixeron unha breve pausa para tomar algo nun local de hostalería da zona con varios veciños. Rueda sinalou que “Agustín non é só o mellor alcalde posible para Soutomaior, é un dos mellores alcaldes da historia de Galicia. Poucos contan coa súa experiencia, o seu liderado e a súa estabilidade”.
Por último, o presidente finalizou indicando que “Soutomaior ten un gran futuro por diante, é un dos concellos máis novos de Galicia e teñen a sorte de contar co mellor guía posible. Soutomaior é o modelo de estabilidade, certeza e sentidiño que queremos estender a todos os concellos de Galicia”, concluíu Rueda.
