– A programación da concellería de Igualdade co gallo do 8M ofrece este mes múltiples actividades. No faladoiro das VI Xornadas Gemma Pereira estarán este venres, día 13, Pilar Martínez, Mª José Rodríguez, Enma Torres e Almudena Suárez. A cita é na Oficina de Turismo ás 19.30 horas.
– Baixo o lema “Palabra de Muller” o Concello de Redondela quere poñer o foco na palabra “como ferramenta de transformación e empoderamento”, explica a alcaldesa Digna Rivas.
A programación do 8M do Concello de Redondela inclúe unha variada oferta de actividades entre as que destaca nos últimos anos as Xornadas Gemma Pereira Otero, que celebran a súa sexta edición. O pasado venres foron as xornalistas Carolina Sertal, Antía Paz e Claudia Morán as que puxeron voz á mesa redonda “Mulleres de Letras”. Este venres, día 13, o título das Xornadas Gemma Pereira Otero é “Mulleres Invisibilizadas”. Intervirán Pilar Martínez (Médica pediatra e fundadora da ONG Da Man); Mª José Rodríguez (Xefa da Unidade de Violencia Contra a Muller da Subdelegación do Goberno en Pontevedra); Enma Torres (decana da Facultade de Ciencias Sociais e da Comunicación da Universidade de Vigo); e Almudena Suárez (Profesora no IES Mendiño e primeira muller segrar autorizada pola Diocese de Tui-Vigo para dirixir a Celebración da Palabra).
A alcaldesa, Digna Rivas, destacou que “este ano queremos poñer o foco na palabra como ferramenta de transformación e empoderamento”. A voz das grandes mulleres que participan na mesa redonda deste venres vai axudaranos a visibilizar “a diversidade, a loita e os avances cara á igualdade”, sinala a rexedora.
A Concellería de Igualdade deseñou unha axenda transversal que busca dar voz e visibilidade ás mulleres nas letras, a ciencia, o activismo e as artes. A programación inclúe tamén actividades dirixidas ao público infantil co contacontos “Elas tamén contan”, que levará a actriz Olga Cuervo ata o Multiúsos de Chapela o venres 20 de marzo. O Concello de Redondela convida a toda a veciñanza a participar nestes actos, todos con entrada de balde. Para máis información, as persoas interesadas poden contactar a través do correo igualdade@redondela.gal.
