O BNG solicita no parlamento a retirada do proxecto e a posta en valor dos 326.000 m2 nos que se pretende construir o polígono industrial.
O deputado nacionalista Luís Bará denuncia o impacto brutal do proxecto nunha zona residencial e de equipamentos públicos, e a afección irreversíbel a unha zona calificada como de risco de inundacións
O BNG levou hoxe ao parlamento as irregularidades na tramitación do proxecto de interese autonómico do parque empresarial de Pontecesures, que foi sometido ao procedemento de información pública o pasado mes de xullo.
O deputado nacionalista chamou a atención sobre a carencia de informes de Augas de Galicia e do Ministerio de Fomento no procedemento de información ambiental e na tramitación do Proxecto de Interese Autonómico (PIA). Cabe lembrar que segundo o Informe Ambiental Estratéxico que fixo público a Dirección Xeral de Calidade Ambiental da Xunta no mes de marzo “acadarase o informe favorable dos órganos competentes en augas e estradas autonómicas e estatais”.
O BNG demanda que Augas de Galicia toma cartas no asunto
Logo do aprazamento da resposta en comisión por parte da Xunta o pasado mes de xullo, hoxe compareceu en comisión parlamentaria a Directora Xeral de Calidade Ambiental, ainda que as preguntas formuladas polo BNG ían dirixidas de maneira clara e directa a Augas de Galicia.
Concretamente, tiñan como finalidade coñecer os informes existentes no organismo autonómico sobre o proxecto, así como as actuacións que ten previsto desenvolver Augas de Galicia en relación co proxecto de parque empresarial de Pontecesures. Segundo Luís Bará “Esta documentación é de extraordinaria relevancia posto que o poligono afecta en parte a unha zona de risco de inundacións, catalogada como tal no plan hidrolóxico en vigor, e no ámbito do parque existen recursos hídricos que non foron correctamente avaliados no PIA. Polo contrario, semella que na documentación se lle dá validez ao estudo hidrolóxico dunha consultora privada que ignora as determinacións do Plan Hidrolóxico e do Plan Básico Autonómico”.
Logo das as alegacións presentadas pola veciñanza e polo BNG o pasado mes de xullo, a Directora Xeral informou que con data 31 de agosto Augas de Galicia requeriulle ao Instituto Galego de Vivenda e Solo documentación adicional sobre a afección en materia de augas, nomeadamnete no referente á rede fluvial e á análise do risco de inundacións.
O BNG solicita a retirada do proxecto e a recuperación e reactivación da zona
En resposta ás afirmación da representante da Xunta, e á vista dos numerosos impactos dun proxecto que calificou de “aberrante”, o deputado nacionalista Luís Bará pediu a retirada do prroxecto: “en vez de urbanizar e asfaltar a zona, defendemos a súa recuperación e posta en valor como espazo produtivo, ambiental e social, porque se trata dunha zona de grande potencialidade agraria, con importantes valores ambientais e con grande interese desde o punto de vista dos recursos hídricos”.
O BNG defendeu a necesidade de promover solo industrial na zona para garantir a creación de emprego e riqueza, mais considerou totalmente errado o emprazamento escollido.
Segundo Bará, “o lóxico é instalar industrias en polígonos xa existentes no Baixo Ulla como os de Catoira, así como o impulso de máis solo empresarial na zona procurando unha ubicación que faga compatíbel a actividade económica e o desenvolvemento sustentábel”.
